Sekretari amerikan i Shtetit, Antony Blinken, do të udhëtojë për në Gjermani më 3 dhe 4 nëntor për të marrë pjesë në takimin e ministrave të jashtëm të G7-ës dhe forumin amerikano-gjerman.
“Sekretari Blinken do t’i bashkohet gjithashtu ministres së Jashtme gjermane, Annalena Baerbock, në Forumin Futures për një diskutim të moderuar mbi të ardhmen e demokracisë në një botë digjitale”, thuhet në njoftimin e Departamentit amerikan të Shtetit të lëshuar nga zëdhënësi Ned Price.
Ministrat e G7-ës do të diskutojnë një sërë sfidash globale, duke përfshirë mbështetjen e grupit të shtatë shteteve më të fuqishme ekonomike për një Ukrainë demokratike, sovrane dhe me prosperitet, forcimin e qëndrueshmërisë ekonomike dhe demokratike në Afrikë dhe Indo-Paqësor, trajtimin e krizës klimatike, sigurinë globale shëndetësore dhe krizat ushqimore dhe energjetike të shkaktuara nga lufta në Ukrainë.