Policia e Kosovës ka arrestuar në Prizren një person të kërkuar, i cili ishte dënuar me një vit burg efektiv për veprën penale “ngacmim”.
Sipas njoftimit të Policisë, arrestimi është realizuar më 16 qershor 2026 nga njësiti për realizimin e urdhëresave të Stacionit Policor në Prizren, pas ndërmarrjes së veprimeve operative-hetimore që çuan në lokalizimin e të dyshuarit.
I arrestuari ishte në kërkim pasi ndaj tij ekzistonte një vendim i plotfuqishëm i Gjykatës Themelore në Prizren, me të cilin ishte dënuar me një vit burg për veprën penale “ngacmim”, sipas nenit 184 të Kodit Penal të Republikës së Kosovës.
Pas arrestimit, personi fillimisht është shoqëruar në Stacionin Policor në Prizren, ndërsa më pas është dërguar në institucionin korrektues për vuajtjen e dënimit.
Policia e Kosovës ka ritheksuar përkushtimin e saj për zbatimin e ligjit dhe arrestimin e personave të kërkuar, me qëllim garantimin e sigurisë publike dhe parandalimin e veprave penale.
Klikoni KËTU për tu bërë pjesë e kanalit të TV Prizreni në Youtube.
