Sot, në ditëlindjen e veprimtarit dhe intelektualit, Ukshin Hoti, ushtruesja e detyrës së presidentes së Kosovës, Albulena Haxhiu, ka bërë homazhe në Shtëpinë Muze të tij, duke nderuar jetën dhe veprën e një prej figurave më të shquara të historisë së re shqiptare.
Përmes një postimi në Facebook, Haxhiu e vlerësoi Hotin si një nga mendjet më të ndritura dhe patriotët më të përkushtuar të kombit, duke theksuar se ai e vuri dijen në shërbim të lirisë dhe të interesit të përgjithshëm. Sipas saj, ai u dallua për guximin, mençurinë dhe përkushtimin e tij të palëkundur në mbrojtje të së drejtës së popullit për vetëvendosje dhe dinjitet kombëtar.
