Presidenti i Serbisë, Aleksandar Vuçiq, ka zgjedhur të njoftojë edhe krerët e Kishës Ortodokse Serbe për atë që është biseduar në Bruksel mes tij dhe kryeministrit të Kosovës, Albin Kurti, të enjten.
Ai ka njoftuar se të dielën ka biseduar me patriarkun serb, Porfrije dhe peshkopin Irinej, për dialogun.
“Së bashku shprehëm shpresën se si vend dhe popull do të kemi forcën për t’u rezistuar të gjitha presioneve, për të ruajtur emrin dhe mbiemrin serb në Kosovë e Metohi, si dhe shtetësinë serbe”, ka shkruar Vuçiqi në Instagram.
Ai të dielën u takua edhe me përfaqësues të serbëve të Kosovës dhe tha se mori mbështetjen e tyre për të kërkuar “zgjidhje kompromisi”. Po ashtu kërcënoi me daljen tyre nga institucionet e Kosovës në rast se Qeveria e Kosovës zbaton vendimet e paralajmëruara për targa dhe dokumente serbe në kufi.