Kryeministri i Kosovës, Avdullah Hoti ka mbajtur një konferencë për media pas takimit që ka pasur me odat ekonomike të Kosovës.
Para mediave, Hoti foli edhe për masat e reja që pritet të merren kundër përhapjes së koronavirusit, shkruan lajmi.net.
Ai tha se Kosova nuk mund të veçohet nga shtetet e Evropës dhe Ballkanit kur bëhet fjalë për masat.
“Masat që tash janë në fuqi kanë prodhuar rezultat të kënaqshëm ndërkohë që po flasim se numri i rasteve të reja është stabilizuar dhe është parandalu rritja eksponenciale. Mjekët në spitale po e përballojnë fluksin e qytetarëve. Unë do të takoj profesionistët shëndetësor për t’i rishiku në detaje masat që do t’i ndërmarrim krahas gjendjes së re. Ju i keni parë masat që janë marrë në regjion dhe Evropë dhe ne nuk jemi të shkëputur. Situata nuk pritet të përmirësohet dhe ne duhet të përgatitemi për të gjitha skenaret. Mora rekomandime nga të gjitha shoqatat”, tha ai.
Hoti po ashtu tha se brenga kryesore e odave ekonomike është orari i mbylljes së bizneseve, dhe për këtë ai tha se është kërkuar një vendim i shpejtë.
“Brenga kryesore është që në përiudhë afatshkurtër është që të rishikohet orari i mbylljes së bizneseve. Unë do të ulem me profesionistët shëndetësor. Sot u takuam që të marrim inpute nga shoqatat ekonomike”, tha ai.
