Deputeti Arbër Rexhaj ka vlerësuar se Raporti i Parlamentit Evropian për lajmet e rrejshme në Ballkanin Perëndimor, qëndron dhe se Vetëvendosje nuk është adresë për kritikë.
Rexhaj në një intervistë në Interaktiv ka thënë se kushdo që sheh arsye për ta kritikuar raportin, që ka potencuar se lajmet e rrejshme kanë rrëzuar Qeverinë Kurti, duhet ta bëjë këtë në adresë të Parlamentit Evropian.
“Është interesante po ta shohësh këtë kritikë dhe mënyrën se si është bërë. Ne nuk e kemi bërë këtë raport, e ka bërë PE-ja, mendoj që nëse ka pasur nevojë për kritikë, për këtë rast ka adresë, është Parlamenti Evropian, jo VV-ja, kjo është e para. E dyta, mendoj që PE-ja e ka thënë një gjë që qëndron.
Prej formimit të Qeverisë Kurti, mendoj që frika e kundërshtarëve tonë politikë ka bërë që për çdo ditë të ketë lajme, të cilat kanë qenë të nivelit që i përmendët (të rrejshme). Por atëherë ka ndryshuar konteksti dhe kanë qenë për kohën kur ne kemi qeverisë”, ka thënë Rexhaj.
Ai ka folur edhe për rolin e mediave, përkatësisht lajmet e rrejshme që sipas tij dhe Raportit të BE-së, bënë që Qeveria Kurti të rrëzohet me mocion mosbesimi.
“Mendoj që PE-ja e ka thënë një gjë shumë të vërtetë, pasi në kohën e Qeverisë Kurti kemi pasur çdo ditë lajme nga më të ndryshmet dhe aty (në raport v.j.) potencohet një gjë, thuhet se prej amerikanëve në përgjithësi nuk ka pasur diçka serioze që Qeveria Kurti nuk bën të qeverisë në Kosovë, pra kanë qenë lajme të fabrikuara, të cilat e kanë luajtur një lloj konglomerati dhe e kanë sjell punën që ka ra Qeveria Kurti me mocion në Kuvend”, ka shtuar ai.