Krahas gjendjes epidemiologjike në Kosovë, që nga janari i vitit 2020, në Fondin për Sigurime Shëndetësore kanë aplikuar 840 pacientë me sëmundje të rënda për trajtim mjekësor jashtë vendit.
Kjo pasi që në institucionet publike shëndetësore në Kosovë, mungon ofrimi i disa shërbimeve mjekësore, shkruan Reporteri.net.
Në një përgjigje zyrtare me shkrim nga Fondi për Sigurime Shëndetësore për Gazetën Online “Reporteri.net”, është bërë e ditur se fondi vjetor për shërim jashtë vendit për pacientët kosovarë është 6 milionë euro.
E sëmundjet për të cilat institucionet publike shëndetësore nuk po mund të ofrojnë trajtim brenda Kosovës janë sëmundjet malinje, leukemitë akute, operacionet e zemrës për fëmijë etj.
“Klinikat të cilat referojnë më së shumti pacientë janë: Pediatria (sëmundjet kardiokirurgjike të fëmijëve, leukemi dhe sëmundje tjera malinje), Oftamologjia, Ortopedia dhe Hematologjia (sëmundjet malinje tek të rriturit)”, thuhet në përgjigjjen e Fondit për Sigurime Shëndetësore.
Numri i atyre që kanë përfituar përkrahje financiare nga shteti për t’u trajtuar jashtë vendit për vitin 2019 është 1,436 pacientë, por ka edhe mijëra qytetarë tjerë që shpenzimet i mbulojnë vetë ose edhe u sigurohen mjetet financiare me anë të aksioneve humanitare. /Reporteri.net
