Departamenti i Gjykatës Themelore në Graçanicë, ka liruar nga paraburgimi shtatë të rinjtë serbë që dyshohen për rrahjen e djalit të politikanit Nenad Rashiq, Nikolës, ka njoftuar Kossev të martën.
Me propozim të prokurorit, Gjykata vendosi për lirimin e katër prej të dyshuarve, kurse për tre të tjerë vendosi burg shtëpiak, mirëpo më pas, edhe kjo u hoq dhe u lanë të lirë, ka njoftuar avokati i njërit prej të dyshuarve, Negovan Sharanoviq për Radio Kim.
Më 22 shkurt, dhjetëra të rinj rrahën djalit e Rashiqit pranë oborrit të shkollës në Lapnasellë.
Prokuroria njoftoi se viktima ka pësuar lëndime të rënda, ndërkohë i ati i Nikolës, Nenad Rashiqi, tha se djali i tij ka pësuar thyrje të hundës, nofullës dhe dhëmbëve ndër të tjera. Sipas tij, Nikola ishte sulmuar me mjete të forta.
Avokati Sharanoviq ka thënë për mediat serbe në Kosovë se nuk di nëse do të ngrihet aktakuzë ndaj të dyshuarve për rrahje.
“Nëse ndodh kjo, avokati mbrojtës do të veprojë sipas ligjit. Nuk do të doja të paragjykoja, por unë kam mbrojtur qëndrimin se klienti im Lazar Karaxhiq, nuk ka arsye të jetë i dyshuar, po ashtu as i burgosur, gjë që me këtë vendim është faktuar”, ka thënë ai.
Sulmi ndaj djalit të Rashiqit kishte shkaktuar tensione të mëdha mes serbëve. Nenad Rashiqi, një politikan i moderuar, akuzoi Listën Serbe dhe Beogradin për nxitje të dhunës, derisa Lista Serbe tha se është “një inskenim i Nenad Rashiqit në koordinim me politikanët në Prishtinë”.