Një atmosferë e dhimbshme ka pushtuar Anfield-in, aty ku mijëra tifozë të Liverpoolit janë mbledhur për t’i dhënë lamtumirën e fundit Diogo Jotës, pas lajmit tronditës për ndarjen e tij nga jeta në një aksident tragjik në Spanjë, së bashku me vëllain e tij.
Që në orët e hershme të mëngjesit, pranë hyrjes së stadiumit legjendar është krijuar një altar nderimi – me lule, fanella të kuqe, shalla të klubit dhe mesazhe zemërthyese për sulmuesin portugez, i cili u bë një ndër figurat më të dashura për tifozët.
Në shenjë zie, flamuri i klubit është ulur në gjysmështizë, teksa heshtja dhe emocionet mbizotërojnë në mesin e mbështetësve të pikëlluar. Shumë prej tyre janë parë me lot në sy, duke ndalur për një moment reflektimi për Jotën – lojtarin që do të kujtohet gjithmonë për përkushtimin, zemrën në fushë dhe buzëqeshjen karakteristike.
“You’ll Never Walk Alone” – është mesazhi që dëgjohet vazhdimisht, si një premtim që kujtimi për të nuk do të zbehet kurrë.
Në ditët në vijim, pritet që Liverpool të organizojë një homazh zyrtar në nderim të Jotës, i cili la pas vetes jo vetëm statistika e gola, por edhe një trashëgimi shpirtërore te bashkëlojtarët dhe tifozët.