Komandanti i KFOR-it, gjeneralmajori Enrico Barduani, ka njoftuar Komitetin Ushtarak të NATO-s për gjendjen e sigurisë në Kosovë dhe aktivitetet e misionit të KFOR-it.
Barduani ka thënë se siguria në Kosovë vazhdon të mbetet e brishtë si rezultat i disa faktorëve, përfshirë edhe angazhimin e pamjaftueshëm të palëve në dialogun e lehtësuar nga BE-ja.
Ai ka theksuar se KFOR-i mbetet i palëkundur për të garantuar një ambient të sigurt dhe liri të lëvizjes për të gjitha komunitetet.
“Komandanti i KFOR-it ka vënë në dukje se situata e sigurisë mbetet e brishtë si rezultat i disa faktorëve, përfshirë tensionet e vazhdueshme në të gjithë rajonin dhe angazhimin e pamjaftueshëm nga Beogradi dhe Prishtina për normalizimi të marrëdhënieve të tyre. Në këtë aspekt, KFOR-i përkrah plotësisht dialogun e lehtësuar nga BE-ja, si kornizë për të arritur zgjidhje afatgjate që do të jetë në përfitim të gjitha komuniteve”, thuhet në njoftimin e KFOR-it.
Kryetari i Komitetit Ushtarak të NATO-s, admirali Giuseppe Cavo Dragone, ka thënë se KFOR-i mbetet kyç për konsolidimin e sigurisë së qëndrueshme në gjithë Kosovën dhe ruajtjen e stabilitetit në rajon.