Instituti Riinvest ka njoftuar se ka realizuar prezantimin e gjetjeve kryesore nga Vlerësimi i Nevojave për Aftësitë Digjitale, të Gjelbra dhe Kreative në rajonin e Prizrenit.
Ky raport, sipas njoftimit, është hartuar me qëllim të vlerësimit të ofertave për arsimin dhe trajnimin profesional në rajonin e Prizrenit, duke identifikuar se sa përputhen ato me nevojat e tregut të punës dhe me tranzicionin në zhvillim digjital dhe të gjelbër.
“Ngjarja ka bërë bashkë përfaqësuesit nga ofruesit e trajnimeve, institucionet dhe partnerët për zhvillim të cilët kanë kontribuar në këtë vlerësim. Pjesëmarrësit kanë ndarë mendime të vlefshme dhe kanë ofruar rekomandime konkrete për forcimin e mëtejshëm të ekosistemit të arsimit dhe trajnimit profesional në rajon”, thuhet në njoftim, raporton Telegrafi.
Në të njëjtën kohë, Instituti Riinvest ka shprehur mirënjohje të veçantë për ITP Prizren, për mbështetjen e këtij procesi si dhe për pjesëmarrjen aktive në formësimin e një mjedisi më përfshirës që i përgjigjet nevojave të tregut në Prizren. /Telegrafi/