Të mërkurën janë bërë pesë ditë kur ministrit të Zhvillimit Rajonal, Fikrim Damka, i është ndryshuar masa e arrestit shtëpiak. Për Damkën tani ka masë ndalimi për t`iu afruar vendit e personit të caktuar, pasi në ditën e zgjedhjeve sulmoi e kërcënoi një kandidate për deputete. Pas zëvendësimit të masës, ai është parë në mbledhjen e Qeverisë
Në ulësen e ministrit krah anëtarëve të tjerë të Qeverisë është kthyer të mërkurën Fikrim Damka.
Ministri i Zhvillimit Rajonal mori pjesë në mbledhjen e kabinetit qeveritar, më pak se një javë nga ndërprerja e arrestit shtëpiak.
Damka është arrestuar ditën e zgjedhjeve nën dyshimin për sulm dhe kanosje të një kandidateje për deputete, derisa ndaj tij ishte caktuar masa e arrestit shtëpiak prej 30 ditësh.
Por, arresti shtëpiak i është ndërprerë më 7 mars, derisa masa i është zëvendësuar me ndalimin për t`iu afruar vendit apo personit të caktuar deri më 7 prill.
Sipas Prokurorisë, ministri Damka dhe një familjar tjetër i tij kanë sulmuar kandidaten për deputete, Arda Maloku, si dhe e ka kërcënuar me jetë Muharrem Jablen.
Damka e Maloku janë pjesëtarë të komunitetit turk, por kundërshtarë politikë në zgjedhjet e 9 shkurtit, njëri si kryetar i Partisë Demokratike Turke të Kosovës e tjetra si kandidate nga Partia e Lëvizjes Inovative Turke.