Aktivistët e komunitetit rom në Prizren kanë siguruar mbështetjen e Komunës për organizimin e një Akademie Solemne me rastin e 8 Prillit – Ditës Ndërkombëtare të Romëve.
Ky dakordim është arritur pas një takimi mes përfaqësuesve të shoqërisë civile rome dhe kryetarit të Komunës së Prizrenit, Shaqir Totaj dhe nënkryetarit, Kujtim Gashi.
Sipas njoftimit, në takim kanë marrë pjesë aktivistët Osman Osmani (Nevo Koncepti), Fatmir Menekshe (Durmish Aslano), Hysni Qylangji (Romani Baxt), Urma Menekshe (mësuese e Gjuhës Rome dhe krijuese e Bibliotekës Rome), Shyrete Hoxhaj (anëtare e Komitetit për Komunitete në Komunën e Prizrenit) dhe Islam Elshani nga Zyra për Komunitete dhe Kthim, të cilët kanë kërkuar nga autoritetet komunale që kjo ditë e rëndësishme për komunitetin rom të shënohet në një mënyrë dinjitoze.
“Pas një diskutimi konstruktiv, kryetari Totaj e aprovoi kërkesën, duke konfirmuar përkushtimin e Komunës së Prizrenit për respektimin dhe promovimin e kulturës, historisë dhe të drejtave të komunitetit rom”, thuhet në njoftim, raporton Telegrafi.
Nisma për këtë aktivitet është hartuar nga Fatmir Menekshe, promotor i kulturës rome në Prizren, dhe Shyrete Hoxhaj, anëtare e Komitetit për Komunitete.
“Ngjarja do të përfshijë aktivitete kulturore, fjalime inspiruese dhe pjesëmarrjen e personaliteteve të shquara. Ky është një hap i rëndësishëm drejt përfshirjes dhe njohjes së kontributit të komunitetit rom në shoqëri”, thuhet në njoftimin e tyre.
Dita Ndërkombëtare e Romëve, shënohet çdo vit më 8 Prill, dhe shërben si moment për të reflektuar mbi historinë, kulturën dhe kontributin e këtij komuniteti. /Telegrafi/
