Ish pjesëtari i UÇK-së, Blerim Ramadani, është arratisur nga arresti shtëpiak që po e mbante në shtëpinë e disa të afërmve në Maqedoni të Veriut.
Nga Ministria e Punëve të Jashtme dhe Diasporës thanë se avokati i Ramadanit ka njoftuar se atij i ishte ndërruar masa e sigurisë nga arrest shtëpiak në kthim në paraburgim.
“Në lidhje me pyetjet tuaja ju njoftojmë që Ambasada e Republikës së Kosovës në Maqedoni të Veriut është njoftuar nga avokati i z. Ramadani se është ndërruar masa e sigurisë nga arresti shtëpiak në kthim në paraburgim, në kohën kur i njejti ishte në pritje të vendimit të Gjykatës Supreme”, thanë nga MPJD për Express.
Nga MPJD thanë se nuk kanë informacione tjera zyrtare nga autoritetet në Maqedoninë e Veriut.
“Ju rikujtojmë që sipas njoftimit tonë paraprak, Gjykata Themelore Penale në Shkup me datë 8 gusht 2024 ka marr vendim për mosekstradimin e z. Blerim Ramadani në Serbi. Ai ishte në pritje të verdiktit final të Gjykatës Supreme ditëve në vijim.”
Gjatë ditës u raportua se ish-pjesëtari i Ushtrisë Çlirimtare të Kosovës, Blerim Ramadani se është arratisur nga arresti shtëpiak nga shtëpia e të afërmve të tij në Maqedoninë e Veriut.
Ministria e Punëve të Brendshme e Maqedonisë së Veriut ka konfirmuar për agjencinë e lajmeve MIA se është duke marrë masa për gjetjen e vendndodhjes së Ramadanit.
Ai ishte arrestuar në bazë të fletëarrestit të lëshuar nga Serbia.
Gjyqtari i procedurës paraprake, Pajazit Pajaziti nga Gjykata Penale në Shkup, e kishte zhvendosur Ramadanin nga paraburgimi në burg shtëpiak në adresën e familjarëve/shokëve të Ramadanit.
Më 9 gusht, Ministria e Punëve të Jashtme e Kosovës, kishte njoftuar se Paneli i Gjykatës Themelore Penale në Shkup ka marrë vendim që ish-ushtari i UÇK-së, Blerim Ramadani të mos ekstradohet në Serbi.
Sipas MPJ-së, Ramadani do të vazhdojë qëndrimin në arrest shtëpiak në Shkup deri në verdiktin final të Gjykatës Supreme të Maqedonisë së Veriut.
Ramadani u arrestua më 17 korrik 2024, në pikëkalimin kufitar Jazhincë/Glloboqicë./GazetaSinjali/
