Pas triumfit në finalen e Kupës së Kosovës në futboll ditë më parë, Ballkani e mposhti Prishtinën edhe në xhiron e 36-të, përkatësisht të fundit për edicionin 2023/2024 në Kosovë.
Ballkani të shtunën fitoi 2:1 ndaj Prishtinës, në ndeshjen e fundit të Superligës së Kosovës.
Ky ballafaqim ishte më shumë festiv, pasi titullin e tretë rresht, suharekasit e siguruan në fundjavën e kaluar.
Të shtunën në Suharekë, Ballkani fitoi me rikthim të rezultatit.
Hasan Hyseni në minutën e 14-të e shënoi golin e parë për mysafirët.
Me të nisur pjesa e dytë, kapiteni Edvin Kuç e barazoi rezultatin.
Në minutën e 78-të shënoi edhe mbrojtësi Armend Thaqi nga penalltia për 2:1, që ishte edhe rezultati përfundimtar i ndeshjes. Kuç dhe Thaqi janë dy prej disa lojtarëve që do të largohen nga Ballkani me gjitha trofetë e fituar.
Kuç do t’i bashkohet Neftchi Bakusë në Azerbajxhan, ndërsa Thaqi te Cluji në Rumani.
Para nisjes së ndeshjes, të dyve iu dha një dhuratë në shenjë respekti për kontributin e dhënë përgjatë këtyre viteve.
Kuç largohet me 205 ndeshje të luajtura, kurse Thaqi me 180 ndeshje.
Ballkani e mbyll kampionatin me 78 pikë, gjashtë më shumë se Llapi i vendit të dytë.
Prishtina e mbyll sezonin pa Evropë dhe me 49 pikë në vendin e pestë./koha.net/