Kryetari i Aleancës për Ardhmërinë e Kosovës, Ramush Haradinaj, ka përkujtuar sot heronjtë e Zonës Operative të Dukagjinit, të brigadës 131, 132 dhe 133 që kanë qenë bashkëluftëtarë të tij në këtë zonë.
Haradinaj ka thënë se fundi i janarit të acartë të vitit 1999 ishte prej ditëve më tragjike të luftës çlirimtare duke thënë se shumë burra që njohu në vijat e frontit u përjetësuan gjatë tentimit që të sjellin armët e lirisë.
“Në fundin e janarit të acartë të vitit 1999, ishin disa prej ditëve më tragjike gjatë Luftës Çlirimtare. Shumë burra që unë i njoha në vijat e frontit, u përjetësuan gjatë tentimit që të sjellin armët e lirisë. Sa herë do të rrëfejmë për heroizmin e tyre, do të kujtojmë betejat, do të kujtojmë Urën në Bishtazhin, Ujzin, Godenin e Rogovën e Hasit. Do të kujtojmë me dhembje e krenari, emrat e tyre, Agron Rama, Agim Zeneli, Sejdi Rama, Agush Gjocaj, Bahtiar Morina, Daut Kelmendi, Emrush Çetaj, Gaspër Karaqi, Gëzim Ademaj, Hamdi Berisha, Haxhi Kleçka, Ilir Merturi, Kasim Shala, Luan Smajli, Vëllezërit Memë e Prend Lleshi, Naim Dreshaj, Naim Gashi, Sahit Krasniqi, Valon Gashi dhe Vesel Avdyli. Do të kujtojmë edhe banorët e Rogovës së Hasit, që u flijuan në tentim për të strehuar e shpëtuar luftëtarët e plagosur, Rrustem Morina me të bijtë Selmanin, Muhametin e Nusretin, Ibrahim Kryeziu, Xhevdet Berisha, Zyber Shala, Adem Shala dhe Rifat Shala. Ata frymëzuan luftën tonë për liri deri në fitore”.
