Eroll Bilibani, udhëheqës i “DokuLab”, ka thënë se filmi do të jetë mjet shtesë në kuptimin e mësimit.
“Mësimdhënësi e zgjedh filmin nga platforma, aty pastaj filmat janë të ndërlidhur për njësitë mësimore. Fleta e punës është e ndërlidhur me temën mësimore. Mësimdhënësit në planin e tyre të punës kanë një hapësirë ku mund të gjejnë materiale në internet, që të mos humbin kohë, të gjejnë video e gjëra të tjera që mund të jenë problematike se si e trajtojnë temën, edhe ato të ndjeshme. Këto janë të përgatitura nga vetë mësimdhënësit”, ka thënë Bilibani.
Me qëllim qasjen e mësimdhënësve në bibliotekën e tyre filmike, më 11 dhjetor të vitit të kaluar u nënshkrua memorandum bashkëpunimi ndërmjet organizatës “DokuFest” dhe Ministrisë së Arsimit, Shkencës, Teknologjisë dhe Inovacionit. Ajo ka për qëllim nxitjen dhe mbështetjen e mësimdhënësit në përdorimin e mjeteve audiovizuale, në këtë rast filmave, në planifikimin dhe zhvillimin e procesit edukativo-arsimor.
Nuk është formë e re që mësimdhënësit të aplikojnë bibliotekën digjitale në orët e mësimit, sikurse edhe trajnimet për mësimdhënësit se si ta përdorin atë. Por punëtoria “Përdorimi i filmit në klasë” është aktiviteti i parë prej memorandumit me Ministrinë.
“Kjo është pjesë e programeve që ne i bëjmë tash e një kohë të gjatë në trajnimin e mësimdhënësve në përdorimin e filmave në klasë dhe në aplikimin e bibliotekës digjitale që e kemi të zhvilluar në kuadër të programit ‘DokuLab’. Tash pasi që e kemi nënshkruar marrëveshjen me Ministrinë e Arsimit kjo është punëtoria e parë që do t’i përmbahet dhe do të përputhet me pikat e marrëveshjes që i kemi me institucionin”, ka thënë Bilibani.
Sipas tij, një numër i konsiderueshëm i mësimdhënësve e përdor filmin në klasë për njësitë mësimore.
“Kemi trajnime qe disa vjet. Deri tash kemi një databazë prej diku 250 mësimdhënësve që e përdorin filmin në klasë. Kjo është pjesa e avancimit në përpjekjet e Ministrisë së Arsimit dhe Shkencës për ta bërë mësimin më interesant, më të kapshëm për nxënësit. Ne jemi si partnerë ku u ofrojmë përdorimin e platformës ‘Biblioteka Digjitale e Mësimdhënësit’ e cila është e qasshme për mësimdhënësit e të gjitha shkollave të Kosovës”, ka thënë Bilibani.
Kur ishte nënshkruar memorandumi ndërmjet ministres së Arsimit, Arbërie Nagavci, dhe drejtoreshës së “DokuFestit”, Linda Llulla-Gashi, Ministria e Arsimit kishte shkruar se ai “parasheh zhvillimin e programeve alternative dhe moderne të mësimdhënies dhe të nxënit përmes gërshetimit të artit dhe të mediave, duke i aftësuar nxënësit të krijojnë dhe të prodhojnë materiale mediatike, prototipe lajmesh dhe të revistave shkollore digjitale”.
Në platformë përfshihen materiale didaktike për përdorimin e filmit në klasë sipas kurrikulës shkollore. Aty përfshihen 157 filma dhe 115 fleta të punës që kanë për qëllim zhvillimin e mendimit kritik dhe anën praktike të procesit mësimor. Kryesisht janë me tema shoqërore me fokus në të drejtat e njeriut.
Me mbushjen e një formulari virtual ku kërkohen të dhënat bazike personale, si dhe shkolla në të cilën punon individi, klasa dhe lënda, kandidati aplikon për qasje në bibliotekën digjitale me filma. Aty janë rubrikat me krejt lëndët shkollore që i përkasin fushës së shkencave shoqërore e natyrore, sikurse edhe fushat kurrikulare si “Shoqëria dhe mjedisi”, “Edukimi mediatik” dhe “Jeta dhe puna”.
Filmat janë të selektuar për secilën lëndë ku të bashkëngjitur janë informacionet se cilës klasë i dedikohet filmi dhe për temat që trajton. Bashkë me të është edhe përmbledhja e shkurtër e filmit. Secilit i është bashkëngjitur fleta e punës e punuar nga mësimdhënësit. Në të përfshihet përshkrimi i filmit, emri i njësisë mësimore, objektivat që synohen dhe rezultatet e të nxënit.
Sipas fletës së punës, filmi pasohet me diskutim nga audienca, në këtë rast nxënësit në klasë. Qëllimi është që filmi të shihet me sy kritik dhe ata të reflektojnë dhe të angazhohen ta shohin problemin lokal në kontekst global, si dhe të merren veprime që kanë ndikim në shoqëri. Aty më pas ndahen pikëpamjet e ndjenjat. Në fletat e punës janë të përcaktuara pikat e diskutimet, si dhe aktivitetet e tjera.
Një rubrikë e veçantë me filma është edhe për shkollat e mesme të ulëta si dhe për platformën “Klasa virtuale” që dedikohet për këtë nivel.
Për zhvillimin e shkathtësive rreth kësaj pjese dhe jo vetëm, “DokuFest” inkurajon mësimdhënësit e shkollave të mesme të larta që ligjërojnë lëndët e shkencave shoqërore dhe ato natyrore që të marrin pjesë në punëtoritë njëditore. Do të jenë nga dy punëtori çdo muaj. Cikli i parë mbahet më 3 dhe 10 shkurt.
Sipas Eroll Bilibanit, punëtoria mbahet në bashkëpunim me Fakultetin e Edukimit nga Universiteti i Prishtinës dhe me mësimdhënësit e përgatitur për të qenë trajnues. Për projektin “Shkolla dhe filmi dokumentar” ka thënë se është ekziston prej vitesh.
“Shkolla dhe filmi dokumentar është program i yni prej më shumë se dhjetë vjet që është manifestuar në forma të ndryshme deri në vitin 2017, kur kemi filluar të aplikojmë metodologjinë e trajnimit të mësimdhënësve në përdorimin e filmit si mjet shtesë për t’iu ndihmuar atyre të trajtojnë një njësi mësimore që nuk ka informata të mjaftueshme”, ka thënë Bilibani.
Materialet ekzistuese në platformën “Biblioteka digjitale e mësimdhënësit” kryesisht ishin krijuar gjatë kohës së pandemisë, kur ishte shfaqur nevoja për to në zhvillimin e orëve mësimore në distancë. Megjithatë, katalogu i titujve të filmave dhe fletëve të punës synohet të zgjerohet. Sipas të dhënave të “DokuFest” deri më tash kjo formë e punës praktikohet në shkollat e 17 komunave në gjithë vendin.
Aty bëhet e ditur se “projekti do të përdorë gjithashtu edhe Manualin për përdorimin e filmit në klasë në gjuhën serbe dhe turke, i cili u prodhua përmes bashkëpunimit të mëparshëm me projektin ‘Njerëzit në Nevojë’”.
“DokuFesti” do të zgjerojë zhvillimin sistematik profesional të mësuesve në gjuhën serbe për të përdorur materiale filmike në klasë./KOHA/
