Kryetari i Partisë Demokratike të Kosovës (PDK), Memli Krasniqi, ka kërkuar nga deputetët që të mos e përkrahin propozimin e Qeverisë për ndarjen e buxhetit për investimet kapitale. Sipas tij ai është diskriminues dhe se partia në pushtet i ka mbështetur vetëm komunat të cilat i udhëheq.
“Derisa për katër komunat që udhëhiqen nga Lëvizja Vetëvendosje, Qeveria ka ndarë më shumë se gjysmën e buxhetit për investime të reja kapitale për vitin 2024, për katër komuna që udhëhiqen nga Partia Demokratike e Kosovës – Ferizajn, Skenderajn, Kaçanikun e Hanin e Elezit, nuk është ndarë asnjë cent”, ka shkruar Krasniqi në Facebook.
Ai ka thënë se katër komunat që udhëhiqen nga Lëvizja Vetëvendosje përbëjnë vetëm 11.6 për qind të popullsisë.
“Gjilani, Shtimja, Kamenica dhe Podujeva përbëjnë 11.6 % të popullsisë së Kosovës, ndërsa u është ndarë 59.5 % e buxhetit për investime të reja kapitale. Ndërkaq, për të gjithë të tjerët, që janë 88.4 % e popullsisë, Qeveria ka ndarë vetëm 40.5 % të këtij buxheti”, ka shkruar Krasniqi.
Sipas tij ky është diskriminimi më i egër institucional ndaj qytetarëve në historinë e Kosovës, që prej çlirimit të vendit.
Ai ka kërkuar nga deputetët, përfshirë ata të pushtetit që të mos e votojnë këtë propozim për buxhetin.
“Kultura politike në Kosovë ka nevojë të shtensionohet e të rritet bashkëpunimi, jo të instalohet kjo kulturë e hakmarrjes dhe diskriminimit. Kjo qasje e Qeverisë kundër qytetarëve të komunave të cilat nuk i drejton partia në pushtet është shantazh i ulët politik. Unë ftoj edhe deputetët e Vetëvendosjes, krahas atyre të opozitës, që me votën e tyre të mos e vulosin këtë propozim diskriminues të Qeverisë. Është e turpshme dhe e papranueshme të votohet për një buxhet të tillë”, ka shkruar Krasniqi.