Shërbimi Spitalor Klinik dhe Universitar i Kosovës ka njoftuar se këtë vit është rritur numri i operacioneve të pacientëve me kancer të gjirit në Klinikën e Kirurgjisë Torakale, krahasuar me vitin e kaluar.
Sipas një njoftimit këtë vit deri më tani janë kryer gjithsej 172 operacione të kësaj natyre, kurse gjatë tërë vitit 2022 ishin kryer gjithsej 149.
“Është rritur numri i operacioneve të karcinomës së gjirit, në kuadër të Klinikës së Kirurgjisë Torakale, të Qendrës Klinike Universitare të Kosovës (QKUK). Bazuar në statistikat e kësaj klinike, vetëm këtë vit, deri më tani, janë kryer 172 operacione të karcinomës së gjirit, kurse tërë vitin 2022, ishin kryer 149 raste”, thuhet në njoftimin e këtij Shërbimi.
Sipas këtij njoftimi pacientet që kanë nevojë për operacion pas karcinomës së gjirit, nuk kanë nevojë të shkojnë për trajtim jashtë vendit, ngase thuhet se klinika ka numër të mjaftueshëm dhe profesional të mjekëve dhe stafit që kryejnë të gjitha llojet e operacioneve të gjirit.
“Për operacion, pas karcinomës së gjirit, nuk ka listë të pritjes dhe të gjitha gratë që kanë nevojë për operacion trajtohen me prioritet nga mjekët e klinikës”, thuhet në njoftim.