Klinika e Kardiologjisë në Qendrën Klinike dhe Universitare të Kosovës po përparon falë mjekut shqiptar, Valon Spahiu, i cili vepron në Gjermani dhe falë ekspertit nga Bullgaria, Vassil Traykov.
Sipas njoftimit të Ministrisë së Shëndetësisë, në Klinikën e Kardiologjisë, njësinë e elektrostimulimit dhe elektrofiziologjisë, brenda katër ditëve janë trajtuar 14 raste të pacientëve me çrregullime të ritmit kardiak.
Kjo është bërë përmes metodës me ablacion me radiofrekuencë e realizuar me sistem modern të navigacionit 3D, si një mënyrë më e sigurt dhe efikase në këto raste.
“Kjo është bërë e mundur falë punës së ekspertëve të elektrofiziologjisë të këtij shërbimi në bashkëpunim me ekspertët elektrofiziolog nga Bullgaria, Prof. Vassil Traykov dhe kryemjeku Dr.Valon Spahiu i cili vepron në Heilbronn, Gjermani” – thotë MSH.
Pacientët që kanë pasur nevojë për këtë shërbim, sipas Ministrisë, më parë janë detyruar ta merrnin jashtë vendit, ndërsa tani kanë filluar t’i marrin në Qendrën Klinike dhe Universitare të Kosovës.
Ministria në vazhdim ka shpjeguar se elektrostimulimi është një teknikë e përdorur për të stimuluar muskujt duke përdorur impuls elektrik.
“Përdorimi i elektrostimulimit ndihmon në rritjen e forcës muskulore, përmirësimin e qarkullimit të gjakut dhe zvogëlimin e dhimbjeve muskulore. Ndërsa, elektrofiziologjia përfshin studimin e impulsit elektrik të qelizave të ndryshme, si muskujt, nervat, zemra, truri, etj” – thotë Ministria e Shëndetësisë.
