Kryetari i Kuvendit të Kosovës, Glauk Konjufca, u ka bërë thirrje qytetarëve të veriut që të dalin masivisht e në zgjedhjet në katër komunat veriore të Kosovës.
Në një postim në rrjetin social Facebook, Konjufca ka thënë se zgjedhjet në veri po mbahen në atmosferë të qetë.
“Sot, në një atmosferë të qetë dhe demokratike po mbahen zgjedhjet lokale në katër komunat e Republikës së Kosovës, përkatësisht në komunën e Veriut të Mitrovicës, Leposaviq, Zveçan dhe Zubin Potok. Zgjedhjet janë mjeti më demokratik dhe mundësia më mirë për qytetarët që përmes votës së lirë të zgjedhin përfaqësuesit e tyre dhe të bëjnë ndryshimet e dëshiruara. Prandaj i ftoj qytetarët me të drejtë vote të këtyre komunave që të marrin pjesë sa më masivisht në zgjedhjet e sotme lokale”, ka shkruar Konjufca në Facebook.
Ai ka thënë se votat e qytetarëve kanë ndikim të madh në vendimmarrjen lokale.
“Mos e humbni rastin. Vota juaj do të ketë ndikim të madh në vendimmarrjen lokale, në ndryshimet e përgjithshme pozitive dhe në jetën e mirëqenien tuaj”, ka shkruar Konjufca./koha.net/