Ambasadori i ShBA-së në Serbi, Christopher Hill ka thënë se ndjen përparim në dialogun ndërmjet Beogradit dhe Prishtinës dhe se sipas tij “një nga elementët më të rëndësishëm të gjithë kësaj është fakti që Prishtina duhet të themelojë Asociacionin e komunave me shumicë serbe.
“Sigurisht që ka gjëra të tjera që Prishtina duhet të bëjë, por mendoj se e gjithë kjo çon në një situatë më të mirë me Bashkimin Evropian dhe në fakt kjo mund të shihet si një marrëveshje ndërmjet Prishtinës dhe Brukselit”, tha Hill dhe shtoi se “e njëjta gjë mund të thuhet edhe për palën serbe”.
Hill shtoi se beson se “shumë meritë” kanë përfaqësuesit e Brukselit për këtë marrëveshje.
Këto deklarata Christopher Hill i bëri gjatë vizitës së tij dy ditore në Luginë të Preshevës, ku ambasadori amerikan atje ka folur edhe për idenë e shkëmbimit të territoreve mes Kosovës dhe Serbisë, teksa e bëri të qartë se kjo çështje nuk është në agjendën e SHBA-ve.
“Unë nuk besoj dhe e di me siguri që shkëmbimi i territoreve nuk është në agjendën e Shteteve të Bashkuara të Amerikës. E di se kjo ka qenë një temë e shekujve të kaluar, jo vetëm në Evropë, por edhe në vendet e tjera. Por, shkëmbimet e territoreve mund te jenë fatale”, theksoi ai.