Në muajin janar të këtij viti në Aeroportin Ndërkombëtar të Prishtinës “Adem Jashari” u realizuan 808 fluturime duke bartur mbi 235 mijë udhëtarë. Kjo shifër është për 4.5 për qind më e madhe se ajo e janarit të vitit 2022.
“Në muajin janar 2023 numri i fluturimeve të realizuara ishte 808 apo 4.53% më shumë së në periudhën e njëjtë të vitit të kaluar, ndërsa i udhëtareve në total ishte 235,567 apo 21.36% më shumë së në periudhën e njëjtë të vitit të kaluar” – thuhet në publikimin e ASK-së.
Në bazë të këtyre të dhënave, numri i qytetarëve që zgjodhën transportin ajror, del të jetë për 41,454 më i lartë, me ç’rast pati edhe më shumë fluturime të realizuara.
![Burimi: Agjencia e Statistikave të Kosovës [ASK]](https://kallxo.com/wp-content/uploads/2023/03/Burimi_Agjencia-e-Statistikave-te-Kosoves_ASK.jpg)
Këto të dhëna u bënë të ditura nga Agjencia e Statistikave të Kosovës (ASK), e cila publikon për herë të parë “Statistikat e Transportit dhe Telekomunikimit” në baza mujore, për muajin janar 2023, me të dhëna mbi Transportin Ajror, Hekurudhor, Rrugor dhe Telekomunikimin.
Burimet e të dhënave sipas ASK-së, janë administrative ku dhënësit e informatave janë Aeroporti Ndërkombëtar i Prishtinës “Adem Jashari “ – LIMAC, Hekurudhat e Kosovës TRAINKOS Sh. A, RAILTRANS ShPK ARKEP- Autoriteti Rregullativ i Komunikimeve Elektronike dhe Postare, ARC – Agjencia për Regjistrim Civil [Departamenti për Regjistrimin e Automjeteve të Kosovës], Ministria e Infrastrukturës [Drejtoria për rrugë].
