Ministrja e Drejtësisë, Albulena Haxhiu, ka bërë të ditur se Komisioni i Venecias ka miratuar të shtunën e 17 dhjetorit ndryshimet në Projektligjin për Byron Shtetërore për Verifikimin dhe Konfiskimin e Pasurisë së Pajustifikueshme
Ministrja e Drejtësisë, Albulena Haxhiu, ka bërë të ditur se Komisioni i Venecias ka miratuar të shtunën e 17 dhjetorit ndryshimet në Projektligjin për Byron Shtetërore për Verifikimin dhe Konfiskimin e Pasurisë së Pajustifikueshme.
Haxhiu përmes një video-adresimi në llogarinë e saj në rrjetin social Facebook nga Venecia, ka thënë se raportuesit për Kosovën theksuan në Komision se Projektligji i ri paraqet një sistem të zbatueshëm të konfiskimit civil në Kosovë.
“Në seancën e 133-të të Komisionit të Venecias të mbajtur sot në Venecia, prezantova ndryshimet në Projektligjin për Byron Shtetërore për Verifikimin dhe Konfiskimin e Pasurisë së Pajustifikuar hartuar nga Grupi Punues i Komisionit për Legjislacion, në linjë me rekomandimet e Komisionin e Venecias. Pas prezantimit dhe diskutimit, Komisioni i Venecias ka pro ndryshimeve të tilla duke konstatuar adresimin e rekomandimeve dhe problemeve të identifikuara në opinionin e muajit qershor të këtij viti. Raportuesit për Kosovën theksuan se tashmë Projektligji i ri paraqet një sistem të zbatueshëm, të konfiskimit civil në Republikën e Kosovës”, ka thënë Haxhiu.
Ajo ka falënderuar pjesëmarrësit që kanë kontribuuar në finalizimin e nismës.
“Në fund falënderoj edhe njëherë të gjithë anëtarët e grupit punues, përfaqësuesit e institucioneve, ekspertët dhe shoqërinë civile për kontributin që kanë dhënë në finalizimin e kësaj nisme të rëndësishme e reformuese”, ka përfunduar Haxhiu.
Më 19 nëntor, kryetari i Kuvendit të Kosovës, Glauk Konjufca, i ka dërguar në Komision të Venecias amendamentet e Projektligjit për Byron Shtetërore për Verifikimin dhe Konfiskimin e Pasurisë së Pajustifikueshme.
