Florian Dushi nga LDK-ja ka thënë se partia e tij po garon për vend të parë duke shtuar se në zgjedhjet e fundit pak vota e kanë ndarë nga vendi i parë.“Sikur në zgjedhjet e mëparshme, LDK është krejt e gatshme të shkojë në zgjedhje në datën që e caktoi u.d presidentja (14 shkurti).
Sikur atëherë edhe kësaj radhe LDK do të bëjë angazhime për të qenë në vendin e parë”.Dushi në Klan Kosova tha se kanë filluar takimet me strukturat e tyre dhe tha se LDK ka një shtrirje horizontale dhe vertikale të përkryer të strukturës së saj.
Ai po ashtu tha se votat që mori LDK në zgjedhjet e kaluara ishin të partisë dhe jo të Vjosa Osmanit, për të cilën tha se duhet të jetë mirënjohëse për angazhimin e strukturave në grumbullimin e votave.
“Sikur në rastin kur ka qenë Osmani, sikur kur ka qenë Mustafa, e nesër Hoti, janë strukturat e partisë që para se të kërkojnë vota për veten kërkojnë për bartësin e listës”.Për Hotin ai tha se për të kandiduar për kryeministër ka marrë mbështetje unanime nga Kryesia dhe Këshilli i Përgjithshëm i LDK-së.
Në pyetjen se sa do ta dëmtojë largimi i Osmanit LDK-në, Dushi ka thënë se kjo mund të jetë vetëm një për qind dhe jo më shumë.
