Trajneri i Prishtinës, Ismet Munishi ka thënë se ndaj Dritës kanë fituar ndeshjen me luftë të madhe në fushë. Ai ka thënë se Prishtina meritoi fitoren në derbin e javës së 12-të të Superligës së Kosovës në futboll.
Prishtina fitoi me përmbysje të rezultatit ndeshjen ndaj Dritës me shifrat 2:1.
“Ishte ndeshje e vështirë. Drita ka skuadër të mirë që luan futboll të mirë. Bëmë një ndeshje të luftuar dhe i jemi qasur ashtu siç duhet ndeshjes ndaj Dritës. Luftuam shumë për këtë fitore dhe këtë fitore ia dedikojmë Qelit dhe po ashtu ‘Plisave’. Do të vazhdojmë luftën edhe në ndeshjet e ardhshme”, ka thënë Munishi.
Ai ka thënë se zëvendësimet ndikuan në lojën e Prishtinës.
“E inkuadruam Santosin, i cili fitoi duelin në golin e parë që e realizuam, ndërsa në të dytin Sherifi kreu punën e tij. Shefiti është i mirë, por ka filluar me vonesë. Te penalltia kishim fat, sepse i ra topi në dorë lojtarit të Dritës. Me angazhim kemi merituar fitoren. Është ende herët të flitet për titull, por nëse nuk na shkëputen shumë klubet në krye të tabelës dhe forcohemi gjatë dimrit, mund të kemi shpresa. Shpresat janë gjithmonë”, ka theksuar Munishi.