Të mërkurën, më 14 maj 2025, me fillim nga ora 14:00, në Shtëpinë e Kulturës “Xhemajli Berisha” në Prizren do të mbahet promovimi i dokumentarit dhe librit “Tridhjet vitet e pajtimit”, një projekt i rëndësishëm që ndriçon një nga kapitujt më të ndritshëm të historisë sonë të afërt – lëvizjen për pajtimin e gjaqeve, plagëve dhe ngatrresave në rajonin e Prizenit.
Ideator dhe autor i këtij projekti është Fetah Bekolli, ndërsa dokumentari është realizuar nga TV Prizreni, me përkrahje financiare nga kompania “Infinit” Sh.p.k..
Libri që shoqëron dokumentarin është përgatitur për botim nga Fetah Bekolli dhe Ditar Kabashi.
Dokumentari “30 vitet e pajtimit” përshkruan zhvillimet dhe sfidat e periudhës 1990 – 2020, duke i kushtuar vëmendje të veçantë kontributit të dhjetëra personaliteteve dhe pajtimtarëve, veçanërisht atyre nga rajoni i Prizrenit që nuk janë më në mesin tonë. Projekti vjen si një akt mirënjohjeje për përpjekjet e tyre të jashtëzakonshme në shërbim të paqes, unitetit dhe kombit.
Ky dokumentar dhe libri që e shoqëron janë dëshmi të fuqishme të një periudhe që nuk duhet harruar, një kujtesë për brezat e sotëm dhe të ardhshëm mbi fuqinë e pajtimit dhe bashkimit kombëtar.
Të gjithë të interesuarit janë të mirëseardhur në këtë ngjarje kulturore dhe historike.