Në ditën e tretë të fushatës zgjedhore, Qeveria në detyrë e Kosovës ka ndarë 1.65 milionë euro për grupin e parë prej 10 mijë studentësh përfitues, në kuadër të Programit të Bursës së Mobilitetit për Studentë.
“Siç kemi njoftuar më parë, vlera e bursave ndryshon varësisht nga distancës prej vendit ku jetojnë dhe vendi ku studiojnë studentët. Kjo bursë synon që të zvogëlojë pabarazitë dhe të krijojë mundësi edhe për ata studentë, që vijnë nga zonat e largëta e që për ta studimet do të ishin më të kushtueshme”- tha Kurti gjatë mbledhjes së Qeverisë.
Kurti tha se me këtë është përmbushur njëri nga premtimet e Qeverisë Kurti për mandatin e ardhshëm.
Ministri në detyrë i Financave, Hekuran Murati tha se përveç këtyre 10 mijë studentëve, presin edhe konfirmimet nga universiteti sa i përket vijueshmërisë dhe aktiviteteve të studentëve të tjerë.
“Sidomos për ata studentë që nuk kanë aq mundësi dhe që e kanë larg universitetin. Shuma e bursës varet nga distanca prej ku jeton dhe universiteti”- tha ai.
Në mbledhjen e datës 07.10.2025, Qeveria në detyrë kishte marrë vendim për 20 milionë për Bursën e Mobilitetit.
“Sa më larg studenti ta ketë universitetin, aq më e madhe do të jetë mbështetja nga Qeveria”- pati thënë Kurti./KALLXO.com