Presidenti i Ukrainës, Volodymyr Zelensky, ka arritur në Downing Street për bisedime me kryeministrin britanik, Keir Starmer, presidentin francez, Emmanuel Macron, dhe kancelarin gjerman, Friedrich Merz, raporton BBC.
Liderët po diskutojnë planin e fundit të paqes për Ukrainën, të hartuar javën e kaluar në Florida gjatë bisedimeve midis zyrtarëve ukrainas dhe amerikanë.
Në komente të shkurtra para bisedimeve, Starmer ka deklaruar se “ne qëndrojmë me Ukrainën”, ndërsa Zelensky ka theksuar se “duhet të marrim disa vendime të rëndësishme”.
Presidenti amerikan, Donald Trum, ka pretenduar të dielën në mbrëmje se negociatorët e Zelenskyt “e duan” planin e fundit. Por ai shtoi: “Duhet të them se jam pak i zhgënjyer që presidenti Zelensky nuk e ka lexuar ende propozimin, që ishte deri para disa orësh”.
“Mendoj se kemi shumë letra në duar”, ka deklaruar Macron.
“Fakt është që ukrainasit po rezistojnë në këtë luftë”, shtoi ai. “Ekonomia ruse po fillon të vuajë veçanërisht pas sanksioneve tona të fundit dhe sanksioneve të SHBA-së”.
Kancelari gjerman, Friedrich Merz, ka theksuar: “Jam skeptik ndaj disa detajeve që po shohim në dokumentet që vijnë nga pala amerikane – por duhet të flasim për këtë”.
“Kjo është arsyeja pse jemi këtu”, ka thënë ai.
Duket sikur Europa dhe SHBA-ja nuk ndajnë më të njëjtën pikëpamje botërore, shkruan korrespondenti i sigurisë, i BBC-së, Frank Gardner.
Ndërkohë, sulmet ruse ndaj Ukrainës vazhdojnë, me të paktën shtatë të plagosur në qytetin juglindor ukrainas, Zaporizhia./KALLXO.com