Zyra e Menaxhimit dhe Buxhetit e Shtëpisë së Bardhë të mërkurën anuloi një memorandum që pezulloi grantet dhe huatë federale, duke krijuar konfuzion të gjerë këtë javë.
“Memorandumi OMB M-25-13 është anuluar. Nëse keni pyetje mbi zbatimin e Urdhrave Ekzekutivë të Presidentit, ju lutemi kontaktoni Këshillin e Përgjithshëm të agjencisë suaj”, thuhet në një memorandum të ri të siguruar nga CNN.
Sekretarja e shtypit e Shtëpisë së Bardhë, Karoline Leavitt, deklaroi se, ndonëse memorandumi i mëparshëm ishte anuluar, urdhrat ekzekutivë të presidentit për pezullimin e ndihmës së huaj dhe përfundimin e nismave për diversitet, barazi dhe përfshirje mbeten në fuqi. Këto urdhra janë më të kufizuara sesa trilionat e dollarëve ndihma që u pezulluan të hënën në mbrëmje.
Zyra e Buxhetit e Shtëpisë së Bardhë kishte urdhëruar pezullimin e granteve dhe huave federale, sipas një memorandumi të brendshëm të dërguar të hënën, i cili shkaktoi shqetësim, edhe pse Shtëpia e Bardhë tha se urdhri nuk ishte aq gjithëpërfshirës sa dukej, transmeton Telegrafi.
Megjithëse ndihmësit e Shtëpisë së Bardhë fajësuan publikisht median për konfuzionin, duke argumentuar se ai nuk ekzistonte brenda administratës, ata kishin marrë një numër të madh telefonatash nga ligjvënës dhe zyrtarë shtetërorë me pyetje mbi ndikimin e vendimit në shtetet e tyre.
Disa anëtarë republikanë të Kongresit shprehën shqetësimet e tyre tek këshilltarët e presidentit, duke treguar se konfuzioni nuk ishte i sajuar. Republikanët ishin të irrituar në mënyrë private për mungesën e një njoftimi paraprak mbi vendimin që shkaktoi zemërim te votuesit.
Agjencitë federale “duhet të ndalojnë përkohësisht të gjitha aktivitetet që lidhen me angazhimin ose shpërndarjen e ndihmës financiare federale”, tha Drejtori i Përkohshëm i OMB, Matthew Vaeth, në memorandumin fillestar të siguruar nga CNN, duke cituar prioritetet e administratës të përcaktuara në urdhrat ekzekutivë të mëparshëm.
Të martën pasdite, një gjykatës federal bllokoi përkohësisht një pjesë të pezullimit të ndihmës nga administrata Trump.
Lideri i pakicës në Senat, Chuck Schumer, të mërkurën u shpreh se administrata Trump e kishte tërhequr pezullimin pas një “proteste mbarëkombëtare” që ushtroi presion politik mbi Shtëpinë e Bardhë.
“Donald Trump sapo anuloi pezullimin e tmerrshëm të OMB-së. Tani ai duhet të tërheqë kandidaturën e Russell Vought për OMB. Russell Vought është arkitekti kryesor i kësaj politike. Besojmë se ata do të përpiqen ta bëjnë këtë në mënyra të tjera”, u tha Schumer gazetarëve në Kongresin amerikan.
Vendimi i Trumpit për të pezulluar triliona dollarë në grante dhe hua federale nxiti një reagim të ashpër nga demokratët të martën, në një mënyrë që lëvizjet e tjera të javës së parë në detyrë nuk kishin arritur.
Një nga çështjet më të mëdha të konfuzionit ishte për Medicaid. Gjatë konferencës së parë për shtyp në Shtëpinë e Bardhë, Leavitt nuk mundi të përgjigjej menjëherë nëse financimi i Medicaid ishte i përfshirë në pezullim. Më vonë, ajo postoi në X se Shtëpia e Bardhë ishte në dijeni se portali i Medicaid ishte i mbyllur dhe tha se “do të rikthehej së shpejti,” por zyrtarët shtetërorë të Medicaid mbetën të bllokuar jashtë portalit të financimit federal për orë të tëra të martën.