Ambasada e Kosovës në Bernë të Zvicrës është duke monitoruar zhvillimet në Crans-Montana, ku dhjetëra persona dyshohet se kanë vdekur dhe afër 100 të tjerë janë plagosur pas një shpërthimi në një bar.
Misioni diplomatik është shprehur se “është në gjendje gatishmërie t’iu ndihmoj qytetarëve të saj”, duke publikuar numrat kontaktues emegjentë.
“Nëse keni nevojë për ndihmë, lajmërohuni në numrin emergjent të ambasadës +41 77 479 11 86. Numri emergjent zviceran për familjet e brengosura: +41 848 112 117”- njofton Ambasada.
Policia zvicrane më 1 janar ka bërë të ditur se në vendin ku ndodhi ngjarja -në një resort luksoz të skijimit në Zvicër po festohej për Vitin e Ri.
Zjarri shpërtheu në orën 01:30 të mëngjesit, sipas kohës lokale, në një bar të quajtur “Le Constellation” në resortin në jugperëndim të Zvicrës.
Disa nga viktimat janë nga vende të tjera, tha Stephane Ganzer, shefi i sigurisë për kantonin Valais. Autoritetet njoftuan se janë mobilizuar dhjetë helikopterë dhe 40 autoambulanca.
Policia kishte thënë më herët se shumë persona po trajtoheshin për djegie. Shumica e të plagosurve janë në gjendje të rëndë, tha Mathias Reynard, kreu i qeverisë të kantonit. Njësia e kujdesit intensiv në spitalin e Valaisit është e mbushur dhe pacientët po transferohen diku tjetër, shtoi ai.
Zona është mbyllur plotësisht dhe mbi Crans-Montana është vendosur një zonë e ndalim-fluturimit, tha policia përmes një njoftimi.
Autoritetet zvicerane thanë se shkaku i shpërthimit mbetet i paqartë.
Prokurorja Beatrice Pilloud tha më vonë se shpërthimi po trajtohet si zjarr dhe jo si sulm, duke shtuar se autoritetet po përpiqen t’ua dorëzojnë trupat e viktimave familjeve të tyre.