Byroja Kosovare e Sigurimit bën të ditur se mërgimtarët të cilët kanë paguar për polisë të sigurimit kufitar mund të shkojnë në pikat e këtij institucioni për t’i marrë parat që kanë paguar, ato do t’u kthehen pas vendimit të ri të Qeverisë.
Vendimi i Qeverisë i liron të gjithë bashkatdhetarët nga pagesa e polisave të sigurimit deri më 31 dhjetor të vitit 2020, transmeton Klan Kosova.
“Sot përmes mediave jemi informuar se gjatë hyrjes në territorin e Republikës së Kosovës, disa nga ju keni paguar primin e sigurimit kufitar për të cilin, përmes marrëveshjes se bashkëpunimit të datës 30.07.2020 Qeveria e Republikës së Kosovës është duke mbuluar koston e këtyre policave të lëshuara deri me datë 31.12.2020”.
“Duke iu kërkuar falje të gjithë qytetareve që kanë paguar primin e sigurimit për policat e sigurimit të lëshuara sipas marrëveshjes se bashkëpunimit të datës 30.07.2020, ju njoftojmë që mund të vini në zyrën qendrore të Byrosë Kosovare të Sigurimit, ose në pikën më të afërt kufitare për kthimin e primit të paguar”, thuhet në njoftimin e BKS-së në rrjetin social Facebook.
