Në ditëlindjen e 68 të komandantit legjendar Adem Jashari dhe në ditën e Flamurit, presidentja Vjosa Osmani në mëngjesin e sotëm ka bërë homazhe në kompleksin memorial në Prekaz.
Ajo është shoqëruar nga kryetari i Kuvendit të Kosovës, Glauk Konjufca dhe një pjesë e kabinetit qeveritar.
Osmani tha se kjo dite historike fillon duke nderuar një figurë dhe familje po aq historike sa vetë flamuri kuq e zi.
“Sot e fillojmë këtë ditë historike duke nderuar një figurë dhe familje po aq historike sa flamuri kuq e zi, familjen Jashari. Duke shënuar ditëlindjen e komandantit legjendar Adem Jashari dhe daljen e parë publike të UÇK-së. Sot shqiptarët kudo që janë e shënojnë këtë ditë dhe është një moment reflektimi për gjithë atë që heronjtë tanë kanë bërë”- tha ajo.
Ndërsa, kryeparlamentari Glauk Konjufca tha se 28 nëntori në Kosovë gjithmonë fillon në Prekaz, ku ka ndodhur sakrifica më e lartë e popullit të Kosovës.
“28 nëntori në Kosovë gjithmonë fillon në Prekaz këtu ku ka ndodhur sakrifica më e lartë e popullit të Kosovës për liri dhe ku është ngjizur lufta e UCK-së. Nëntorët do të festohen gjithmonë. Uroj që neve të na gjejnë gjithmonë më të bashkuar e më të fortë”- tha ai.
Sot festohet 111 vjetori i shpalljes së Pavarësisë së Shqipërisë dhe Ditës së Flamurit.