Policia e Kosovës ka bërë të ditur përmes një njoftimi se 12 persona në Prizren janë intervistuar në polici, nën dyshimin për organizim të bixhozit të paligjshëm, ndërsa njëri prej tyre është dërguar në mbajtje, raporton PrizrenPress.
Në njoftim thuhet se më 25 tetor, nga Stacioni Policor Prizren është pranuar informatë se në një lokacion në Prizren dyshohet se po zhvillohen lojëra fati dhe bixhoz, që në Kosovë për momentin është e ndaluar me ligj.
“Patrulla policore në detyrë i është përgjigjur rastit dhe në lokalin e supozuar janë hasur 12 persona, në lokal ka qenë edhe pronari i lokalit i cili është i dyshuar për organizimin e lojërave të fatit dhe bixhozit të kundërligjshëm. Gjatë kontrollit të lokali janë gjetur edhe disa prova dhe dëshmi që ndërlidhen me organizimin e lojërave të fatit dhe bixhozit: disa qindra çipa-zhetonë pokeri dhe 7 palë letra pokeri”, thuhet në njoftim.
Sipas policisë, të gjithë të dyshuarit janë urdhëruar të paraqiten në stacionin policor dhe të njëjtit janë intervistuar në cilësinë e të dyshuarve.
“Nga hetuesi kujdestar është informuar Prokurori i Shtetit, të gjithë të dyshuarit me urdhër te Prokurorit pas intervistimit janë liruar vetëm njeri nga ata është ndaluar për 48 orë ne ndalim policer”, thuhet në njoftim.