Të enjten, në Gjykatën Themelore në Prizren, dega në Dragash, është mbajtur seanca fillestare, ndaj të pandehurit F. B., i cili po akuzohet për veprën penale “zjarrevënie”.
Pasi që është njoftuar me objektin e aktakuzës nga ana e prokurores, Elfete Purova, i pandehuri ka deklaruar se nuk e ndjen veten fajtor, për veprën me të cilën akuzohet, raporton “Betimi për Drejtësi”.
Gjyqtarja e çështjes Sabaheta Kurteshi, e ka udhëzuar të pandehurin që në afatin prej 30 ditësh, të bëjë kërkesën për hudhje të aktakuzës, kurse seancën e dytë për këtë rast, e ka caktuar për me datën 13 janar 2021, në ora 11:00.
Përndryshe, sipas aktakuzës së ngritur me datën 10 korrik 2020, nga Prokuroria Themelore në Prizren, i pandehuri F.B., akuzohet se me datën 19 prill 2020, rreth orës 13:00 në fshatin Brezne, Komuna e Dragashit, saktësisht në vendin e quajtur “Shavare” të Llopushniku, më qellim ndez zjarrin në atë mënyrë që t’ ia ve flaken barit.
Vepra ndodh në atë mënyrë që, ai donte që ta pastronte barin e rritur në pronën e mikut të tij, me anë të një qibriti ia vë flaken barit dhe nga pamundësia që ta lokalizoj zjarrin e ndezur, i cili kaplon barin, shkurret, plepat dhe disa drunje të ahut që ndodheshin në pronat e të dëmtuarve Qerim Kryeziu dhe Tafil Kryeziu, atyre ju shkakton dëme materiale.
Me këto veprime ai dyshohet se ka kryer veprën penale “zjarrevënia”, e paraparë në nenin 322 , paragrafi 1 të Kodit Penal të Republikës së Kosovës. /BetimipërDrejtësi
