Mbi 8 mijë persona kanë nënshkruar peticionin për faljen e Suzana Zogiani Sekiraqa, e cila është dënuar me 25 vjet burgim për vrasjen e bashkëshortit. Nënshkruesit e peticionit po kërkojnë amnisti për Suzanën, pasi po konsiderojnë se procesi i gjykimit të saj nuk është i rregullt. Suzana ka thënë se e ka vrarë burrin në vetëmbrojtje pasi ai ka ushtruar dhunë sistematike ndaj saj dhe fëmijëve.
Në web faqen chanche.org ka nisur një peticion përmes së cilit po kërkohet rigjykim për rastin e Suzana Zogiani Sekiraqa.
Nënshkruesit e këtij peticioni po kërkojnë nga ushtruesja e detyrës së Presidentit, Vjosa Osmani, faljen e dënimit të Suzanës.
Suzana Zogiani Sekiraqa, nënë e dy fëmijëve, në nëntorin e vitit 2018 ka privuar nga jeta bashkëshortin e saj Artan Sekiraqa.
Ngjarja kishte ndodhur në qytetin Dole të Francës, ku sipas aktgjykimit, Suzana kishte goditur 11 herë me sëpatë bashkëshortin e saj.
Pas vrasjes, Suzana kishte marrë rrugën drejtë Kosovës, bashkë me dy fëmijët e saj. më pas, siç ka deklaruar ajo, është paraqitur në ambasadën e Francës në Kosovë, duke kërkuar që të kthehet në Francë, gjë e cila nuk i është mundësuar.
Ajo ka deklaruar se bashkëshorti ka ushtruar dhunë sistematike ndaj saj. Madje, ajo ka thënë se ai kishte dhunuar djalin.
Gjykata Themelore në Prishtinë e ka shpallur fajtore, duke shqiptuar dënim me burgim prej 25 vjestësh./GazetaExpress/