Lituania ka shpallur të martën (09.12.2025) gjendje të jashtëzakonshme shkaku i kërcënimeve ndaj sigurisë publike nga balonat e kontrabanduar me origjinë nga Bjellorusia, ka njoftuar qeveria lokale, raporton Reuters.
Lituania akuzon Bjellorusinë se lejon kontrabandistët të përdorin balona meteorologjike për transportim të duhanit të kontrabanduar përtej kufirit, duke e detyruar vazhdimisht aeroportin e Vilniusit t’i ndalojë operacionet dhe trafikun ajror.
“Gjendja e jashtëzakonshme shpallet jo vetëm për shkak të ndërprerjeve të aviacionit civil, por edhe për shkak të interesave të sigurisë kombëtare.”- ka deklaruar ministri i Brendshëm, Vladislav Kondratovic, në një takim qeveritar që u transmetua drejtpërdrejt.
Deklarata i jep liri më të madhe operacionale ushtrisë, duke i lejuar të veprojë në koordinim me policinë ose pavarësisht, ka shtuar Kondratovic, megjithëse nuk ka specifikuar detaje të mëtejshme.
Kohëzgjatja e masave të jashtëzakonshme nuk është bërë menjëherë e qartë.
Bjellorusia, e cila ka lejuar që territori t’i përdoret për pushtimin e Ukrainës nga Rusia më 2022, ka mohuar përgjegjësinë për balonat dhe ka akuzuar Lituaninë për provokime, duke përfshirë edhe dërgimin e dyshuar të një droni për të hedhur “material ekstremist”.
Lituania, që dikur ishte pjesë e Bashkimit Sovjetik, tani anëtare e NATO-s dhe e Bashkimit Europian, i ka hedhur poshtë këto akuza si të rreme.
Presidentja e Komisionit Europian, Ursula von der Leyen, ka deklaruar më 1 dhjetor se situata në kufi po “përkeqësohet” dhe i ka quajtur sulmet me tullumbace “sulm hibrid” bjellorus që është “krejtësisht i papranueshëm”.
Lituania në vitin 2021 shpalli një gjendje të jashtëzakonshme në rajonin kufitar të Bjellorusisë për shkak të asaj që e quajti migrim të paligjshëm në vendin baltik, duke kufizuar qasjen në zonë për jo-rezidentët.
Vilnius do të shpallte në vitin e pastajmë gjendje të jashtëzakonshme pas pushtimit të Ukrainës nga Rusia për shkak të frikës se Lituania gjithashtu mund të bëhej cak, duke vendosur kufizime në lirinë e fjalës për të frenuar atë që e quajti propagandë të mundshme ruse./KALLXO.com