Është bërë lansimi i fushatës “Të Gëzoheni me Fëmijë”, e udhëhequr nga UNFPA në partneritet me IPKO Foundation, në shënim të Ditës Ndërkombëtare të Fëmijës Vajzë.
Kryeministri i Kosovës, Albin Kurti, i cili u adresua me një videomesazh gjatë ngjarjes, tha se Qeveria është e përkushtuar t’i mbështesë të gjitha kategoritë, pa dallim.
“I duhet shtëpisë një djalë është një shprehje që ende e dëgjojmë në shoqërinë tonë. Dukuria që prish raportin natyror të lindjeve nuk duhet të ketë vend më në Kosovë. Vajza jonë është dhurata më e çmuar për mua dhe Ritën. T’i themi jo praktikës dhe preferencës për djalë, sepse kush ka vajzën botën ka”, tha ai.
Nga të pranishmit u pohua se fushata ka për qëllim të rrisë ndërgjegjësimin në lidhje me çështjen sensitive të abortit selektiv në Kosovë dhe ndërlidhjen e saj me qasjen e pabarabartë të vajzave në edukim, me qëllim të ndërmarrjes së nismave më efektive për ta adresuar këtë shqetësim.
Përderisa ministri i Shëndetësisë Arben Vitia tha se po punohet në vazhdimësi në përmirësimin e kushteve dhe shërbimeve.
Ministrja e Arsimit, Shkencës, Teknologjisë dhe Inovacionit, Arbërie Nagavci, tha se qasja në arsim do të jetë e barabartë për të gjithë e sidomos për vajzat.
