Kryeministri i Kosovës, Albin Kurti, përmes një postimi në Facebook, ka njoftuar se mbi 200 milionë euro investime janë paraparë për rehabilitimin e linjës hekurudhore Hani i Elezit – Leshak.
Kurti, tutje ka thënë se në agjendë të Qeverisë është edhe ndërtimi i hekurudhës Prishtinë-Durrës.
“Mbi 200 milionë euro investime janë paraparë për rehabilitimin e linjës hekurudhore Hani i Elezit – Leshak. Krahas saj, në agjendë të punës e kemi edhe hekurudhën Prishtinë-Durrës, që është një prej projekteve më të rëndësishme infrastrukturore dhe kombëtare të historisë së pas çlirimit”, ka shkruar Kurti.
Kurti, teksa ka ndarë një video të postuar nga ministri i Infrastrukturës, Liburn Aliu, nga punimet në linjën hekurudhore, ka theksuar se modernizimi i hekurudhës do ta transformojë transportimin e mallrave dhe njerëzve, do t’i forcojë dhe shpeshtojë lidhjet e qyteteve, dhe do ta mbrojë mjedisin nga ndotja.