Kompania Rajonale e Ujësjellësit “Hidroregjioni Jugor” ka apeluar tek konsumatorët që të paguajnë faturat e shpenzimeve të ujit, pasi sipas tyre borxhi i përgjithshëm ndaj kompanisë tashmë ka kaluar vlerën 11 milionë €.
“Ky nivel i borxhit është i papranueshëm dhe po dëmton seriozisht funksionimin e shërbimeve të ujësjellësit. Të gjithë konsumatorët janë të obliguar që t’i shlyejnë pagesat deri në fund të vitit. Kompania , në ditët në vazhdim, është e detyruar të marrë masa të shtuara: shkyçje nga rrjeti dhe procedura përmbarimore për të gjithë debitorët. Nuk do të ketë përjashtime” – thuhet në njoftim.
Sipas KRU-së, marrëveshje me këste do të ofrohen vetëm për konsumatorët që paraqiten dhe e marrin obligimin seriozisht.
“Hidroregjioni Jugor” thekson se shlyerja e obligimeve ndihmon kompaninë të sigurojë furnizim më të mirë me ujë dhe të realizojë investime të reja në shërbim të qytetarëve.
“Furnizimi i qëndrueshëm me ujë kërkon përgjegjësi. Paguani obligimet – mos e rrezikoni shërbimin tuaj” – shkruan KRU “Hidroregjioni Jugor”.