Një person ka ndërruar jetë pas një incidenti me thikë që ka ndodhur të dielën mbrëma, rreth orës 21:20, në fshatin Zhur. Viktima ishte dërguar fillimisht në Spitalin Rajonal të Prizrenit me plagë të rënda, për t’u transferuar më pas në Qendrën Klinike Universitare të Kosovës (QKUK) në Prishtinë, ku ka ndërruar jetë si pasojë e lëndimeve të marra.
Policia e Kosovës ka bërë të ditur se i dyshuari për rastin ndodhet në arrati, ndërsa hetimet janë në zhvillim e sipër.
“Sonte, më datë 10.08.2025, rreth orës 21:20, Policia e Kosovës ka pranuar informacion se një person me lëndime është dërguar në emergjencën e Spitalit Rajonal të Prizrenit. Sipas mjekëve, viktima, mashkull, ishte therur me thikë dhe ndodhej në gjendje të rëndë shëndetësore. Ai është dërguar për trajtim në QKUK – Prishtinë, ku më pas ka ndërruar jetë si pasojë e plagëve të marra”, thuhet në njoftimin e Policisë.