Biennalja ndërkombëtare e artit bashkëkohor, “Autostarada Biennale” ka përzgjedhur Erzen Shkolollin si kurator të edicionit të 5-të të ngjarjes.
Organizatorët në komunikatën me të cilën kanë shpalosur vendimin, kanë theksuar se ky emërim vjen si mision për shndërrimin e artit në forcë.
“Ekspertiza e gjerë e Shkolollit dhe bashkëpunimi i tij me institucione vendore e ndërkombëtare dhe artistë të shumtë nga rajoni dhe bota i përshtatet në mënyrë të përkryer karakterit të Bienales. Erzeni bëhet kuratori i parë kosovar i bienales dhe bashkëpunimi ynë me të synon të përmbushë njërin prej qëllimeve tona për shndërrimin e artit në një forcë, që sjell ndryshime pozitive dhe mirëqenie”, thuhet në komunikatën për media.
Ndërkaq Shkololli theksoi se ‘Autostada Biennale’ është një nga platformat më të rëndësishme të artit bashkëkohor në Kosovë dhe në rajon.
“Për mua, kjo është një sfidë dhe një përgjegjësi e madhe, të cilën po e pranoj me entuziazëm dhe ambicie. Mezi pres të bashkëpunoj ngushtë me ekipin e jashtëzakonshëm të biennales, për të sjellë artistë në Kosovë dhe për t’i zbatuar projektet e tyre”, tha Shkololli.
Aktualisht, ai është kurator i përgjithshëm i galerisë Cukarna në Ljubljanë. Shkololli ka udhëhequr suksesshëm disa institucione të artit, përfshirë Galerinë Kombëtare të Arteve të Shqipërisë (2018–2022) dhe Galerinë Kombëtare të Arteve të Kosovës (2011– 2015). Nën udhëheqjen e tij, të dy institucionet kanë kaluar nëpër transformime të rëndësishme.
Kuratoret e dy edicioneve paraprake kanë qenë Joanna Warsza dhe Övül Ö. Durmusoglu. Autostrada Biennale u themelua në vitin 2014 me misionin për të përdorur artin bashkëkohor si një mjet për të fuquizuar komunitetin dhe për të nxitur kreativitetin me vizionin e një të ardhmeje më gjithëpërfshirëse dhe të qëndrueshme.