Stadiumi Memorial i Marinës Amerikane i shërben një qëllimi më të madh se futbolli.

Në fund të fushës është një mur që paraqet emrat e betejës së Marinës së SHBA ose të Trupave Detare, shkruan navysports.com, transmeton klankosova.tv.

I vendosur përgjatë pjesës jugperëndimore të këtij muri është i shkruar emri Kosovë për të kujtuar përpjekjet e Shteteve të Bashkuara dhe NATO-s në Evropën Lindore.

Mirëpo për një futbollist aktual të Marinës, kjo luftë është jashtëzakonisht personale.

“Nëse nuk do të ishte Amerika, familja ime do të kishte vdekur,” tha Lirion Murtezi – i rankut Midshipmen.

“Për fat të keq kam pasur edhe anëtarë të tjerë të familjes që kanë vdekur gjatë luftës, por nëse nuk do të kishin ardhur Shtetet e Bashkuara dhe NATO në atë kohë, unë nuk do të isha këtu”.

Familja e Murtezit është nga Republika e Kosovës, një vend i vogël në Evropën Lindore, të cilin ai e përshkruan që ndodhet në lindje të Italisë dhe në veri të Greqisë. Gjatë Luftës së Kosovës në fund të viteve 1990, familja e Mutezit u largua nga vendi i shkatërruar nga lufta dhe erdhi në Shtetet e Bashkuara.

“Të rritesha në vitet e 90-ta në Kosovë, të shkoja në shkollë, të kaloja luftë, të isha i persekutuar për shkak të kombësisë sime, ishte e vështirë”, tha Agron Murtezi, vëllai i madh i Lirionit.

“Jam shumë mirënjohës që jam këtu, shumë mirënjohës për Shtetet e Bashkuara”.

Në pranverën e vitit 1999, familja erdhi në Fort Dix në New Jersey përpara se të transferohej në New Mexico. Pas përfundimit të Luftës së Kosovës, Familja Murtezi u kthyen në vendlindje. Në vitin 2001, Lirioni lindi në kryeqytetin e Kosovës.

Në vitin 2002, babai, motra dhe vëllai i Lirionit patën mundësinë të ktheheshin në Shtetet e Bashkuara dhe u transferuan në zonën e Pittsburgh. Vetëm në vitin 2006, Lirioni, mamaja e tij dhe motra tjetër ishin në gjendje të ribashkoheshin me familjen e tyre.

Ndërsa u ambientua me jetën amerikane, Lirioni filloi të mësonte për futbollin, një sport që nuk e njihte përpara se të vinte në Amerikë.

“Në moshë të re, vëllai im gjithmonë shikonte futboll”, tha Lirion. “Padyshim që më interesoi për sportin”.

Kur Lirioni hyri në klasën e shtatë, filloi të luante futboll amerikan. Në klasën e nëntë, ai ishte një nga dy nxënësit e vitit të parë që bëri ekipin e universitetit të shkollës së tij të mesme.

Marina ishte shkolla e parë që rekrutoi Murtezin. Në vitin 2017, ai bëri vizitën e tij të parë në Annapolis për të parë Marinën të përballet me UCF. Sapo hyri në stadium, diçka i ra në sy.

“Më kujtohet që shkova në stadium dhe shikova majtas dhe pashë Kosovën atje dhe isha si uau”, tha Lirion.

Sa herë që Murtezi hyn në stadiumin Memorial të Trupave Detare, atij i jepet mundësia të shohë fjalën Kosovë pranë stolit të Marinës.

“Duke qenë nga atje më jep një ndjenjë të madhe krenarie,” tha Lirioni. “Duke parë atë shenjë sa herë që kalojmë nëpër atë stadium, dalim dhe ecim majtas, shoh Kosovën. Më jep një ndjenjë të madhe krenarie.”

“Kjo do të thotë liri dhe do të thotë se ky vend ishte arsyeja pse vendi ynë është i lirë”, tha Agroni – vëllai i Lironit. “Unë jam shumë krenar për të, e gjithë familja është krenare për të dhe është një vend i veçantë për të për të luajtur”.

Tani një i ri në Akademinë Detare, Lirion Murtezi, i cili është një shtetas amerikan, ka synime të mëdha. Ndonëse ka ende më shumë se një vit nga marrja e detyrës së tij të shërbimit, Murtezi dëshiron të kontribuojë për vendin që ka bërë kaq shumë për familjen e tij.