Votuesit francezë po përgatiten të votojnë në rundin e parë të zgjedhjeve presidenciale që do të zhvillohen këtë të diele, më 10 prill.
Sondazhet e fundit kanë treguar një rënie të dukshme në avantazhin e presidentit, Emmanuel Macron ndaj sfidueses së tij kryesore, kandidates së ekstremit të djathtë Marine Le Pen, shkruan të shtunën BBC.
Fushata tani ka përfunduar dhe pjesëmarrja e votuesve pritet të jetë më e ulët se në zgjedhjet e mëparshme në Francë.
Edhe pse gara është lënë në hije nga lufta në Ukrainë, një çështje kyçe për shumë votues është kostoja e jetesës.
Macron dhe zonja Le Pen janë favoritët kryesorë, por ka 10 kandidatë të tjerë që konkurrojnë për të arritur në rundin e dytë, më 24 prill.
Një muaj më parë, Le Pen ishte pas Macronit me 10 pikë, dhe po luftonte për një vend në rundin e dytë kundër tij.
Tani ajo shihet si favoritja për ta sfiduar për presidencën pas rundit të parë. Nëse ajo arrin të kalojë në balotazhin e 24 prillit, sondazhet sugjerojnë për herë të parë se një fitore e Le Pen është brenda kufirit të gabimit, shkruan BBC.
Vlerësimet e sondazhit të Macron u rritën fillimisht nga përpjekjet e tij diplomatike gjatë ditëve të para të pushtimit rus të Ukrainës, por votuesit mbeten shumë të shqetësuar nga rritja e faturave në Francë.
Ndërkohë, Le Pen ka punuar shumë për të zbutur imazhin e saj vitet e fundit dhe për ta paraqitur veten si të afërt, të moderuar dhe të përshtatshme për postin më të lartë.
Macroni tani po propozon punësim të plotë brenda pesë viteve, duke ulur taksat për familjet dhe bizneset, duke rritur gradualisht moshën e pensionit nga 62 në 65 – megjithëse rritja e moshës së pensionit është e papëlqyeshme me votuesit që tashmë përballen me një krizë të kostos së jetesës.
Analistët parashikojnë që pjesëmarrja në votime do të jetë aq e ulët sa do të tejkalohet norma rekord e abstenimit prej 22.2% e vendosur në vitin 2017.