Kryeministri i Kosovës, Avdullah Hoti, pas takimit me anëtarët e Këshillit Koordinues të Asociacioneve të Familjarëve të të Zhdukurve të Kosovës, u dakorduan që të shihen më shpesh, teksa shtoi se autoritetet serbe do obligohet të tregojë për të gjitha vendndodhjet e varrezave masive.
Hoti, këto deklarime i bëri në llogarinë e tij zyrtare në ‘Facebook’, gjersa deklaroi se qeveria në të cilën udhëheq ai do ofrojë mbështetje të vazhdueshme për të gjitha shoqatat e familjarëve të të zhdukurve, raporton Gazeta Express.
“Kjo çështje do të zgjidhet me arritjen e marrëveshjes përfundimtare midis Kosovës dhe Serbisë, me ç’rast Serbia obligohet që të ofroj të gjitha të dhënat për vendndodhjen e varrezave masive”, ka thënë Hoti, duke iu referuar çështjes së të pagjeturve.
“Për këtë bisedova sot me anëtarët e Këshillit Koordinues të Asociacioneve të Familjarëve të të Zhdukurve të Kosovës, me të cilët u dakorduam që takimet e këtij formati të jenë të rregullta”, deklaroi ndër të tjera i pari i ekzekutivit.
Lidhur me gërmimet në trevat serbe për gjetjen e varrezave masive, dje foli Drejtori i Institutit të Mjekësisë Ligjore të Kosovës, Arsim Gërxhaliu. Ky i fundit paralajmëroi për ndërprerje punimesh për shkak të kushteve të liga.
Sipas tij, delegacioni kosovar për të pagjeturit, pas vizitës që ia bëri Shtavalit të Serbisë para dy muajsh, do përqëndrojë gërmimet në këtë zonë. Në Shtaval dyshohet se janë të fshehura 20 autobusë me trupa të viktimave nga gjenocidi serb në Kosovë.