Shtimi i rasteve me COVID-19 në Evropë ka bërë që shumë shtete të shtrëngojnë masat për pandeminë, ndërsa Danimarka është bërë vendi i parë europian pa masa.
Italia
Nga 1 shkurti Italia forcoi kufizimet për ata që nuk janë vaksinuar kundër COVID-19.
Italianët do të duhet të tregojnë dëshmi të vaksinimit ose shërimit për të hyrë në zyrat publike, banka, posta, librari dhe qendra tregtare.
Pensionistët e pavaksinuar nuk do të jenë më në gjendje të marrin pensionet e tyre personalisht nga një zyrë postare. Vaksinimi për personat mbi 50 vjeç në shtetin fqinj është i detyrueshëm.
Austria
Nga kjo e martë edhe Austria bëhet shteti i parë evropian ku vaksinimi është i detyrueshëm për të gjithë personat mbi 18 vjeç.
Përjashtohen ata që kanë arsye të veçanta mjekësore, gratë shtatzëna dhe ata që kanë pak kohë që e kanë kaluar virusin. Qytetarët që nuk vaksinohen gjobiten nga 600 në 3600 euro.
Danimarka
Nga ana tjetër, Danimarka bëhet vendi i parë i Bashkimit Evropian që heq të gjitha kufizimet anti-COVID pavarësisht numrit të lartë të të infektuarve.
Nuk ka më maska, certifikata COVID apo mbyllje të bareve, restoranteve dhe klubeve.
Në fuqi do të mbeten vetëm disa kufizime në kufij, për udhëtarët e pavaksinuar që vijnë nga vendet jashtë zonës Shengen.
Britania
Edhe në Britani maskat dhe dëshmia e COVID nuk janë më të detyrueshme në ambientet e brendshme.
