Të hënën në Kosovë janë administruar 21.370 vaksina antiCOVID, që është rekord ditor.

Sipas të dhënave në uebfaqen e Ministrisë së Shëndetësisë në total në Kosovë janë administruar 601.691 vaksina.

Me dy doza të vaksinave janë administruar 213.176 qytetarë, ndërsa me një dozë 175.339 qytetarë.

Ministria e Shëndetësisë të hënën ka njoftuar se do të lejohet vaksinimi kundër COVID-19 në Kosovë edhe për fëmijët mbi 12 vjet. Ata do të vaksinohen me vaksinën Pfizer. Deri më tash ka qenë e lejuar të vaksinohen vetëm personat mbi 18 vjet.

“Ministri i Shëndetësisë i Republikës së Kosovës, z. Arben Vitia, ka aprovuar rekomandimin e dhënë nga trupa profesionale kompetente-Komiteti për imunizim kundër COVID-19, për plotësimin e Planit Shtetëror të Vaksinimit kundër COVID-19. Duke marrë parasysh që vaksina Pfizer BioN/Tech është aprovuar nga FDA dhe EMA për vaksinimin e moshave mbi 12 vjeç, plotësimi i planit përfshin: vaksinimin e personave mbi 16 vjeç me vaksinën Pfizer dhe vaksinimin e grup moshës 12-15 vjeç me prioritet dhe sipas indikacioneve shëndetësore”, thuhet nga MSH-ja.