Nehat Idrizi ish-Kryesues i Këshillit Gjyqësor të Kosovës nuk e ka ndërmend të “dorëzohet” në garën për president të vendit, edhe pse një emër i njohur si Vjosa Osmani është pretendentja kryesore për t’u zgjedhur në këtë pozitë të lartë shtetërore.
Duke parë se jo të gjitha partitë politike nuk po bien dakord për Vjosa Osmanin presidente, Idrizi ju ka dërguar një letër deputetëve të Kuvendit, përmes së cilës kërkon ta mbështesin për kryetar shtetit, si kandidat apartiak, shkruan Reporteri.net.
“Unë si kandidat apartiak i ftoj subjektet politike të përkrahin një kandidaturë të tillë, sepse faktori i unitetit të popullit dhe jo vetëm, mund të jetë vetëm një person i cili asnjëherë nuk ka qenë pjesë e betejave politike ndërpartiake”, ka shkruar ai në Facebook.
Idrizi edhe më 20 nëntor të vitit 2020 zyrtarisht kishte shpallur kandidaturën për president të Kosovës.
Letra e Idrizit dërguar deputetëve:
Të nderuar deputetë
Afatet kushtetuese për zgjedhjen e presidentit janë afër përfundimit.
Sipas nenit 86 parag.2 të Kushtetutës, zgjedhja e presidentit duhet të bëhet jo më vonë se 30 ditë para përfundimit të mandatit të presidentit actual.
Konsiderojmë se u.d i presidentit është edhe president aktual, prandaj edhe në rastin konkret neni 86 par.2 i Kushtetutës është i zbatushëm.
Siç duket nga zhvillmet e fundit politike në vend po afirmohet gjetja e një zgjidhje perpmes një presidenti i cili do të jetë faktor i unitetit. Këtë funksion mund ta ushtroj vetëm një president apartiak i cili do të ishte i pranueshëm për spektrin e gjërë politik në Republikës e Kosovës.
Unë si kandidat apartiak i ftoj subjektet politike të përkrahin një kandidaturë të tillë, sepse faktori i unitetit të popullit dhe jo vetëm, mund të jetë vetëm një person i cili asnjëherë nuk ka qenë pjesë e betejave politike ndërpartiake.
Ne kemi vlerësuar se deri më tani nuk është bërë ndonjë lëvizje e duhur konkrete për zgjedhjen e presidentit.
Pas datës 5 prill zgjedhja e presidentit mund të jetë jokushtetuese dhe vendi mund të ketë pasoja të pariparueshme.
Andaj, i ftojmë të gjitha subjektet politike parlamentare që të marrin pjesë në zgjedhjen e presidentit konsensual.
Sinqerisht,
Nehat Idrizi
