Bilanci i viktimave nga COVID-19 në Shqipëri vazhdon të jetë i rënduar, edhe pse për epidemiologët shifrat kanë filluar të zbresin.
“Sa i përket numrit të rasteve, incidencës 2-javore, trendi paraqitet i qëndrueshëm, madje me një prirje të lehtë në rënie. Po ulet gjithnjë e më shumë mosha e të prekurve dhe mbizotëron mosha 55-64 vjeç, ndjekur nga grupmosha 45-54 dhe grupmosha tjetër 35-44 vjeç”, tha epidemiologu Artan Simaku.
Mosha më aktive ka përqindjen më të madhe të të infektuarve.
“Mosha mesatare e rasteve të konfirmuara gjatë javës së fundit ishte 50 vjeç”, tha Simaku.
Sipas epidemiologut Artan Simaku, qytetarët duhet të bëjnë kujdes dhe të respektojnë masat, sepse edhe pse ka nsiur procesi i vaksinimit pandemia do vijojë për disa muaj.
“Këto masa janë harruar qoftë nga popullata, qoftë nga bizneset. Sëmundja nuk ka kaluar, do bashkëjetojmë edhe shumë muaj të tjerë me sëmundjen”, u shpreh epidemiologu.
Sipas të dhënave të Ministrisë së Shëndetësisë, 1 në 4 persona që testohet rezulton i infektuar me koronavirus./klan news
