Ministri në detyrë i Shëndetësisë, Arben Vitia ka njoftuar se kanë filluar punimet për rregullimin e plotë të sistemit të kanalizimit fekal dhe atmosferik në Qendrën Klinike Universitare të Kosovës (QKUK).
Sipas tij, me investimin prej 1.3 milion euro do të zgjidhet përfundimisht një nga problemet më të mëdha infrastrukturore të QKUK-së, pasi në këtë sistem nuk është ndërhyrë që nga vitet ’60.
“Po nisim punimet për rregullimin e plotë të sistemit të kanalizimit fekal dhe atmosferik në QKUK. Me një investim prej 1.3 milion eurosh, po e zgjidhim përfundimisht një nga problemet më të mëdha infrastrukturore të QKUK-së , një sistem ku nuk është ndërhyrë që nga vitet ’60 dhe që për dekada ka shkaktuar përmbytje të bodrumeve në disa klinika”, ka shkruar Vitia.
Vitia theksoi se ky projekt trevjeçar do të modernizojë të gjithë rrjetin e kanalizimit dhe do t’i japë fund një sfide shumëvjeçare, duke krijuar siguri, kushte më të sigurta dhe më funksionale për klinikat ne QKUK.